kah kar wo shab-ba-KHair dua de ke so gaya

kah kar vo shab-ba-ḳhair du'ā de ke so gayā

bechain aarzū ko ye kyā de ke so gayā

Daalā hai aaj kaise pas-o-pesh meñ mujhe

tasvīr apnī jān-e-adā de ke so gayā

tang aa ke merī tifl-mizājī se āḳhirash

ḳhvāb-āvarī kī mujh ko davā de ke so gayā

kitnī shaboñ kā jaagā vo duniyā ko tohfatan

zarb-e-kalīm bāñg-e-darā de ke so gayā

jaagā to nīm-shab meñ vo makkār santarī

sab jāgte raho ye sadā de ke so gayā

vo ik nigāh-e-nāz-o-adā Dālne ke baa'd

bīmār dil ko dard nayā de ke so gayā

dil Dūbtā hai 'nazr' to ham-rāz vo mirā

apnā jamāl apnī vafā de ke so gayā

kah kar wo shab-ba-KHair du'a de ke so gaya

bechain aarzu ko ye kya de ke so gaya

Dala hai aaj kaise pas-o-pesh mein mujhe

taswir apni jaan-e-ada de ke so gaya

tang aa ke meri tifl-mizaji se aaKHirash

KHwab-awari ki mujh ko dawa de ke so gaya

kitni shabon ka jaga wo duniya ko tohfatan

zarb-e-kalim bang-e-dara de ke so gaya

jaga to nim-shab mein wo makkar santari

sab jagte raho ye sada de ke so gaya

wo ek nigah-e-naz-o-ada Dalne ke ba'd

bimar dil ko dard naya de ke so gaya

dil Dubta hai 'nazr' to ham-raaz wo mera

apna jamal apni wafa de ke so gaya