kaha hai kis ne ki ab to shayad gulab mausam idhar na aae

kahā hai kis ne ki ab to shāyad gulāb mausam idhar na aa.e

bhalā ye mumkin hai jaane vaalā palaT ke 'fīroz' ghar na aa.e

huā vo aadī kuchh is tarah se qafas ke majbūr roz-o-shab kā

rihā huā bhī magar parinde ke der tak bāl-o-par na aa.e

akelgī ke azāb-e-mausam ab apnī hastī pe bhog pyāre

ki ḳhud tumhī ne mujhe kahā thā tirī duā meñ asar na aa.e

munāfiqat ke fareb-sahrā meñ dhuup ne chaaT lī haiñ āñkheñ

kaḌī rutoñ kī masāfatoñ meñ rafāqatoñ ke shajar na aa.e

maiñ shām-e-shahr-e-vafā meñ 'fīroz' us kī āvāz DhūñDhtā huuñ

jahāñ vo mil ke bichhaḌ gayā thā vo sang-e-manzil nazar na aa.e

kaha hai kis ne ki ab to shayad gulab mausam idhar na aae

bhala ye mumkin hai jaane wala palaT ke 'firoz' ghar na aae

hua wo aadi kuchh is tarah se qafas ke majbur roz-o-shab ka

riha hua bhi magar parinde ke der tak baal-o-par na aae

akelgi ke azab-e-mausam ab apni hasti pe bhog pyare

ki KHud tumhi ne mujhe kaha tha teri dua mein asar na aae

munafiqat ke fareb-sahra mein dhup ne chaT li hain aankhen

kaDi ruton ki masafaton mein rafaqaton ke shajar na aae

main sham-e-shahr-e-wafa mein 'firoz' us ki aawaz DhunDhta hun

jahan wo mil ke bichhaD gaya tha wo sang-e-manzil nazar na aae