kaha hai maine ye kab mahtab mil jae

kahā hai maiñ ne ye kab māhtāb mil jaa.e

mujhe to bas mirī āñkhoñ kā ḳhvāb mil jaa.e

maiñ is galī se yahī soch kar guzartā huuñ

kitāb-e-zīst kā gum-gashta baab mil jaa.e

sabhī gunāh maiñ hañs kar qubūl kar lūñgā

faqīh-e-shahr kā tujh ko ḳhitāb mil jaa.e

mile faqat mire hisse kī raushnī mujh ko

talab kahāñ hai koī āftāb mil jaa.e

ba-qadr-e-zarf hī garche savāl hai merā

ajab nahīñ ki mujhe be-hisāb mil jaa.e

maiñ bahr-e-fikr meñ huuñ ġharq is liye 'nāyāb'

guhar mujhe bhī koī zer-e-āb mil jaa.e

kaha hai main ne ye kab mahtab mil jae

mujhe to bas meri aankhon ka KHwab mil jae

main is gali se yahi soch kar guzarta hun

kitab-e-zist ka gum-gashta bab mil jae

sabhi gunah main hans kar qubul kar lunga

faqih-e-shahr ka tujh ko KHitab mil jae

mile faqat mere hisse ki raushni mujh ko

talab kahan hai koi aaftab mil jae

ba-qadr-e-zarf hi garche sawal hai mera

ajab nahin ki mujhe be-hisab mil jae

main bahr-e-fikr mein hun gharq is liye 'nayab'

guhar mujhe bhi koi zer-e-ab mil jae