kaha jo un se ki ab be-qarar hum bhi hain

kahā jo un se ki ab be-qarār ham bhī haiñ

to hañs ke kahte haiñ be-iḳhtiyār ham bhī haiñ

bahār-e-gulshan-e-hastī se ho ke begāna

asīr-e-dām-e-ġham-e-rozgār ham bhī haiñ

habāb maujoñ pe ubhrā to aah bhar ke kahā

rahīn-e-hastī-e-nā-pā.edār ham bhī haiñ

hasīñ manāzir-e-fitrat ke dekhne vaalo

fidā-e-san.at-e-parvardigār ham bhī haiñ

baḌhā de jām-e-mohabbat idhar bhī ai saaqī

nigāh-e-lutf ke ummīd-vār ham bhī haiñ

galī ko un kī gulistāñ banā diyā ham ne

ba-rang-e-mauj-e-nasīm-e-bahār ham bhī haiñ

guzar chuke haiñ jidhar se musāfirān-e-'adam

ravāñ udhar hī sar-e-rahguzār ham bhī haiñ

jo qāfile meñ nahīñ haiñ to ye bhī kyā kam hai

ki rāh-e-'ishq meñ musht-e-ġhubār ham bhī haiñ

butoñ ke ishq meñ barbād ho ga.e lekin

jahān-e-'ishq kī ik yādgār ham bhī haiñ

zahe-nasīb adā ho rahī hai rasm-e-vafā

vo sharmsār haiñ to ashk-bār ham bhī haiñ

kabhī na ham ne harīfoñ kā e’tibār kiyā

nigāh-e-ġhair meñ be-e'tibār ham bhī haiñ

vo aañkh uThā ke na dekheñ hameñ to kyā ġham hai

ki un kī bazm meñ begāna-vār ham bhī haiñ

tasavvurāt kī rangīniyāñ haiñ pesh-e-nazar

chaman meñ 'zabt' ba-rang-e-bahār ham bhī haiñ

kaha jo un se ki ab be-qarar hum bhi hain

to hans ke kahte hain be-iKHtiyar hum bhi hain

bahaar-e-gulshan-e-hasti se ho ke begana

asir-e-dam-e-gham-e-rozgar hum bhi hain

habab maujon pe ubhra to aah bhar ke kaha

rahin-e-hasti-e-na-paedar hum bhi hain

hasin manazir-e-fitrat ke dekhne walo

fida-e-sanat-e-parwardigar hum bhi hain

baDha de jam-e-mohabbat idhar bhi ai saqi

nigah-e-lutf ke ummid-war hum bhi hain

gali ko un ki gulistan bana diya hum ne

ba-rang-e-mauj-e-nasim-e-bahaar hum bhi hain

guzar chuke hain jidhar se musafiran-e-'adam

rawan udhar hi sar-e-rahguzar hum bhi hain

jo qafile mein nahin hain to ye bhi kya kam hai

ki rah-e-'ishq mein musht-e-ghubar hum bhi hain

buton ke ishq mein barbaad ho gae lekin

jahan-e-'ishq ki ek yaadgar hum bhi hain

zahe-nasib ada ho rahi hai rasm-e-wafa

wo sharmsar hain to ashk-bar hum bhi hain

kabhi na hum ne harifon ka e’tibar kiya

nigah-e-ghair mein be-e'tibar hum bhi hain

wo aankh uTha ke na dekhen hamein to kya gham hai

ki un ki bazm mein begana-war hum bhi hain

tasawwuraat ki ranginiyan hain pesh-e-nazar

chaman mein 'zabt' ba-rang-e-bahaar hum bhi hain