kaha jo usne ki kahiye to kuchh gila kya hai

kahā jo us ne ki kahiye to kuchh gilā kyā hai

mirī zabān se niklā ki fā.eda kyā hai

udaas dekh ke mahfil ko merī kahte haiñ

yahāñ bhī koī musībat kā mubtalā kyā hai

bas aaj tak to bahut ḳhuub hijr meñ guzrī

ab aage dekhiye taqdīr meñ likhā kyā hai

tamām ho ga.e ham dāstān ho ga.ī ḳhatm

ab aur qissa-e-furqat kī intihā kyā hai

gale se aa ke mile vo to aur dil taḌpā

baḌhe davā se to phir dard kī davā kyā hai

har ek ashk ke qatre meñ ḳhuuñ kī shirkat ne

hamārā zaḳhm-e-jigar be-mahal hañsā kyā hai

jo dekhtā huuñ kabhī aa.ina maiñ furqat meñ

to ḳhud bhī kahtā huuñ ye aap ko huā kyā hai

sitam pe daad ke ḳhvāhāñ tumhīñ se haiñ 'jāved'

vo jāneñ kyā ki jafā kyā hai aur vafā kyā hai

kaha jo us ne ki kahiye to kuchh gila kya hai

meri zaban se nikla ki faeda kya hai

udas dekh ke mahfil ko meri kahte hain

yahan bhi koi musibat ka mubtala kya hai

bas aaj tak to bahut KHub hijr mein guzri

ab aage dekhiye taqdir mein likha kya hai

tamam ho gae hum dastan ho gai KHatm

ab aur qissa-e-furqat ki intiha kya hai

gale se aa ke mile wo to aur dil taDpa

baDhe dawa se to phir dard ki dawa kya hai

har ek ashk ke qatre mein KHun ki shirkat ne

hamara zaKHm-e-jigar be-mahal hansa kya hai

jo dekhta hun kabhi aaina main furqat mein

to KHud bhi kahta hun ye aap ko hua kya hai

sitam pe dad ke KHwahan tumhin se hain 'jawed'

wo jaanen kya ki jafa kya hai aur wafa kya hai