kaha kisi ne ki hai chhalawa kisi ne tashbih di pari se

kahā kisī ne ki hai chhalāvā kisī ne tashbīh dī parī se

vo aaj mahfil meñ jalva-ārā hue haiñ is shān-e-dilbarī se

koī ishāra na kuchh kināya kahī hai ik baat sādgī se

abhī ho nādāñ nasīb-e-ā’dā kahīñ uThāo na zak kisī se

nahīñ ki dil āshnā nahīñ hai rumūz-o-ādāb-e-'āshiqī se

kuchh is meñ tark-e-vafā nahīñ hai uThā.eñ gar haath zindagī se

liyā kaf-e-pā kā maiñ ne bosa kuchh is meñ tark-e-adab nahīñ thā

chalo haTāo qusūr merā ḳhatā bhī hotī hai aadmī se

marīz kā ab laboñ pe dam hai shifā kī ummīd is kī kam hai

jo ab bhī aao baḌā karam hai ki saañs haiñ chand āḳhirī se

nahīñ bhale un ke taur ye bhī koī balā hogī aur ye bhī

na ho koī tarz-e-jaur ye bhī ki aa ga.e baaz kajravī se

baḌā hī pur-lutf hogā manzar kareñge us dam salām jhuk kar

ki dekhte hoge pesh-e-dāvar hameñ pashemāñ se multajī se

milegā aġhyār ko bahāna uThā.egā uñgliyāñ zamāna

jinheñ hai pās-e-vafā ye maanā vo muñh na moḌeñge bandagī se

savāl saa.il kā yuuñ na moḌo javāb se us kā dil na toḌo

dil-e-shikasta ko balki joḌo tum apne altāf-e-khusravī se

sunā.eñ kyā mājrā-e-ulfat hai ek 'ālam meñ us kī shohrat

tumhāre jalve hamārī vahshat haiñ dīdanī se shanīdanī se

'ajīb hai rog 'āshiqī kā kare bhī koī to kyā mudāvā

na 'ḳhār' aisā marīz dekhā taḌap uThe dard kī kamī se

kaha kisi ne ki hai chhalawa kisi ne tashbih di pari se

wo aaj mahfil mein jalwa-ara hue hain is shan-e-dilbari se

koi ishaara na kuchh kinaya kahi hai ek baat sadgi se

abhi ho nadan nasib-e-a’da kahin uThao na zak kisi se

nahin ki dil aashna nahin hai rumuz-o-adab-e-'ashiqi se

kuchh is mein tark-e-wafa nahin hai uThaen gar hath zindagi se

liya kaf-e-pa ka main ne bosa kuchh is mein tark-e-adab nahin tha

chalo haTao qusur mera KHata bhi hoti hai aadmi se

mariz ka ab labon pe dam hai shifa ki ummid is ki kam hai

jo ab bhi aao baDa karam hai ki sans hain chand aaKHiri se

nahin bhale un ke taur ye bhi koi bala hogi aur ye bhi

na ho koi tarz-e-jaur ye bhi ki aa gae baz kajrawi se

baDa hi pur-lutf hoga manzar karenge us dam salam jhuk kar

ki dekhte hoge pesh-e-dawar hamein pasheman se multaji se

milega aghyar ko bahana uThaega ungliyan zamana

jinhen hai pas-e-wafa ye mana wo munh na moDenge bandagi se

sawal sail ka yun na moDo jawab se us ka dil na toDo

dil-e-shikasta ko balki joDo tum apne altaf-e-khusrawi se

sunaen kya majra-e-ulfat hai ek 'alam mein us ki shohrat

tumhaare jalwe hamari wahshat hain didani se shanidani se

'ajib hai rog 'ashiqi ka kare bhi koi to kya mudawa

na 'KHar' aisa mariz dekha taDap uThe dard ki kami se