kaha tha humne tujhe to ai dil ki chah ki mai ko tu na pina

kahā thā ham ne tujhe to ai dil ki chaah kī mai ko tū na piinā

jo is ko pī kar tū aisā bahkā ki ham ko mushkil huā hai jiinā

jo āñkheñ chanchal kī dekheñ ham ne to nok-e-mizhgāñ ne dil ko chedā

nigah ne hosh-o-ḳhirad ko luuTā adā ne sabr-o-qarār chhīnā

kahā jo ham ne ki aan lagiye hamāre siine se is dam ai jaañ

to sun ke us ne hayā kī aisī ki aayā muñh par vahīñ pasīna

kiyā hai ġhussa meñ haath lā kar mirā garebāñ jo TukḌe us ne

phaTā hī rahnā hai ab to behtar nahīñ munāsib kuchh is ko siinā

kahā thā ā.ūñgā do hī din meñ vale na aayā vo shoḳh ab tak

ginā jo ham ne 'nazīr' dil meñ to us suḳhan ko huā mahīna

kaha tha hum ne tujhe to ai dil ki chah ki mai ko tu na pina

jo is ko pi kar tu aisa bahka ki hum ko mushkil hua hai jina

jo aankhen chanchal ki dekhen hum ne to nok-e-mizhgan ne dil ko cheda

nigah ne hosh-o-KHirad ko luTa ada ne sabr-o-qarar chhina

kaha jo hum ne ki aan lagiye hamare sine se is dam ai jaan

to sun ke us ne haya ki aisi ki aaya munh par wahin pasina

kiya hai ghussa mein hath la kar mera gareban jo TukDe us ne

phaTa hi rahna hai ab to behtar nahin munasib kuchh is ko sina

kaha tha aaunga do hi din mein wale na aaya wo shoKH ab tak

gina jo hum ne 'nazir' dil mein to us suKHan ko hua mahina