kaha tha usne mohabbat ki aabru rakhna

kahā thā us ne mohabbat kī aabrū rakhnā

chubhe hoñ kitne bhī kāñTe guloñ kī ḳhū rakhnā

diloñ ko toḌ na Daale tumhārī haq-goī

bajā.e harf ke ā.īna rū-ba-rū rakhnā

jo vaqt ahl-e-vafā se kabhī lahū māñge

to sab se pahle lab-e-teġh par gulū rakhnā

ḳhizāñ se haar na jaanā kisī bhī hālat meñ

numū mile na mile ḳhvāhish-e-numū rakhnā

burā na kahnā zamāne ko ham zamāna haiñ

hamāre ba.ad zamāne se guftugū rakhnā

faqīh-e-shahr ke fatve kī haisiyat kyā hai

to ḳhud ko apnī nigāhoñ meñ surḳh-rū rakhnā

visāl-e-dost kī saa.at bhī aane vaalī hai

sahar qarīb hai 'akbar' abhī vazū rakhnā

kaha tha us ne mohabbat ki aabru rakhna

chubhe hon kitne bhi kanTe gulon ki KHu rakhna

dilon ko toD na Dale tumhaari haq-goi

bajae harf ke aaina ru-ba-ru rakhna

jo waqt ahl-e-wafa se kabhi lahu mange

to sab se pahle lab-e-tegh par gulu rakhna

KHizan se haar na jaana kisi bhi haalat mein

numu mile na mile KHwahish-e-numu rakhna

bura na kahna zamane ko hum zamana hain

hamare baad zamane se guftugu rakhna

faqih-e-shahr ke fatwe ki haisiyat kya hai

to KHud ko apni nigahon mein surKH-ru rakhna

visal-e-dost ki saat bhi aane wali hai

sahar qarib hai 'akbar' abhi wazu rakhna