kaha ye aaj hamein fahm ne suno sahib

kahā ye aaj hameñ fahm ne suno sāhib

ye bāġh-e-dahr ġhanīmat hai dekh lo sāhib

jo rañg-o-bū ke uThāne meñ haz uThā liije

mabādā phir kaf-e-afsos ko malo sāhib

ye vo chaman hai nahīñ ek se nahīñ jis meñ

tabaddul is kā har ik gul se soch lo sāhib

ki thā jo sub.h-e-shagufta na thā vo shaam ke vaqt

jo shaam thā so na dekhā vo sub.h ko sāhib

pas is misāl se zāhir hai ye suḳhan ya.anī

isī tarīq se aalam meñ tum bhī ho sāhib

jo sarnavisht hai hogā isī tarah se 'nazīr'

qazā qazā nahīñ hone kī kuchh karo sāhib

kaha ye aaj hamein fahm ne suno sahib

ye bagh-e-dahr ghanimat hai dekh lo sahib

jo rang-o-bu ke uThane mein haz uTha lije

mabaada phir kaf-e-afsos ko malo sahib

ye wo chaman hai nahin ek se nahin jis mein

tabaddul is ka har ek gul se soch lo sahib

ki tha jo subh-e-shagufta na tha wo sham ke waqt

jo sham tha so na dekha wo subh ko sahib

pas is misal se zahir hai ye suKHan yani

isi tariq se aalam mein tum bhi ho sahib

jo sarnawisht hai hoga isi tarah se 'nazir'

qaza qaza nahin hone ki kuchh karo sahib