kahan anjam ki taswir us nadan ke aage

kahāñ anjām kī tasvīr us nādān ke aage

banā.e ret kī dīvār jo tūfān ke aage

havādis kā tasalsul yūñhī rahtā hai zamāne meñ

kisī kī jaan ke pīchhe kisī kī jaan ke aage

sitāre Dhāltī haiñ tarbiyat-gāheñ tamaddun kī

to phir kyoñ zindagī be-nūr hai insān ke aage

lahū meñ Duub kar jab ik navā-e-jāñ-fazā niklī

hazāroñ saaz sākit ho ga.e us taan ke aage

ye vo daur-e-taġhayyur hai ki jis meñ ḳhil.at-e-shāhī

nigūñ sar hai shikasta chādaroñ kī shaan ke aage

tire qadmoñ se nisbat jin ko hai vo sar jhukeñ kyūñkar

kisī maġhrūr ke dar par kisī sultān ke aage

hamārī hī nazar parvarda hai vo be-amāñ bijlī

kaḌaktī hai jo har fir.aun-e-be-sāmān ke aage

nikhārā ho jise ahl-e-hunar ne apnā ḳhuuñ de kar

vo fan be-rang kyā hotā kisī bohrān ke aage

zamāna sard kar degā 'adīb' in shola-zāroñ ko

na.ī duniyā kī jannat hai na.e insān ke aage

kahan anjam ki taswir us nadan ke aage

banae ret ki diwar jo tufan ke aage

hawadis ka tasalsul yunhi rahta hai zamane mein

kisi ki jaan ke pichhe kisi ki jaan ke aage

sitare Dhaalti hain tarbiyat-gahen tamaddun ki

to phir kyon zindagi be-nur hai insan ke aage

lahu mein Dub kar jab ek nawa-e-jaan-faza nikli

hazaron saz sakit ho gae us tan ke aage

ye wo daur-e-taghayyur hai ki jis mein KHilat-e-shahi

nigun sar hai shikasta chadaron ki shan ke aage

tere qadmon se nisbat jin ko hai wo sar jhuken kyunkar

kisi maghrur ke dar par kisi sultan ke aage

hamari hi nazar parwarda hai wo be-aman bijli

kaDakti hai jo har firaun-e-be-saman ke aage

nikhaara ho jise ahl-e-hunar ne apna KHun de kar

wo fan be-rang kya hota kisi bohran ke aage

zamana sard kar dega 'adib' in shola-zaron ko

nai duniya ki jannat hai nae insan ke aage