kahan dhuan hai kahan ghar samajh mein aaega

kahāñ dhuāñ hai kahāñ ghar samajh meñ aa.egā

havā chalegī to manzar samajh meñ aa.egā

talāsh-e-gauhar-e-nāyāb sat.h par kyoñ hai

bhañvar meñ utro samundar samajh meñ aa.egā

abhī se tabsira shaḳhsiyyatoñ pe Thiik nahīñ

ho guftugū to suḳhanvar samajh meñ aa.egā

har ek ḳhvāb na.ī sub.h kī amānat hai

kar intizār muqaddar samajh meñ aa.egā

muqāble kī ghaḌī aa ga.ī zarā Thahro

vo daarā hai ki sikandar samajh meñ aa.egā

'zamīr' bhiiḌ meñ chehroñ kā jā.eza liije

kahāñ se aayā hai patthar samajh meñ aa.egā

kahan dhuan hai kahan ghar samajh mein aaega

hawa chalegi to manzar samajh mein aaega

talash-e-gauhar-e-nayab sath par kyon hai

bhanwar mein utro samundar samajh mein aaega

abhi se tabsira shaKHsiyyaton pe Thik nahin

ho guftugu to suKHanwar samajh mein aaega

har ek KHwab nai subh ki amanat hai

kar intizar muqaddar samajh mein aaega

muqable ki ghaDi aa gai zara Thahro

wo dara hai ki sikandar samajh mein aaega

'zamir' bhiD mein chehron ka jaeza lije

kahan se aaya hai patthar samajh mein aaega