kahan duniya se laDna hai kahan KHud se baghawat hai

kahāñ duniyā se laḌnā hai kahāñ ḳhud se baġhāvat hai

use samjhā rahā huuñ jo mohabbat kī rivāyat hai

hazāroñ dukh uThātā huuñ hazāroñ zaḳhm khātā huuñ

magar jaatī nahīñ ye muskurāne kī jo aadat hai

jahāñ par jab bhī jī chāhe zamīñ par baiTh jaatā huuñ

ki mere jism kī miTTī ko miTTī se mohabbat hai

maiñ apne gaañv ke sab khet-khāle yaad rakhtā huuñ

na-jāne shahr meñ rahte hue ye kaisī aadat hai

hameñ kuchh is liye bhī umr bhar ab saath rahnā hai

tujhe merī zarūrat hai mujhe terī zarūrat hai

zamīñ par paañv rakh kar koī chaltā hī nahīñ 'nāsir'

nahīñ ma.alūm is duniyā meñ kis ko kitnī ujlat hai

kahan duniya se laDna hai kahan KHud se baghawat hai

use samjha raha hun jo mohabbat ki riwayat hai

hazaron dukh uThata hun hazaron zaKHm khata hun

magar jati nahin ye muskurane ki jo aadat hai

jahan par jab bhi ji chahe zamin par baiTh jata hun

ki mere jism ki miTTi ko miTTi se mohabbat hai

main apne ganw ke sab khet-khaale yaad rakhta hun

na-jaane shahr mein rahte hue ye kaisi aadat hai

hamein kuchh is liye bhi umr bhar ab sath rahna hai

tujhe meri zarurat hai mujhe teri zarurat hai

zamin par panw rakh kar koi chalta hi nahin 'nasir'

nahin malum is duniya mein kis ko kitni ujlat hai