kahan ehsan meri zat par taqdir ka hoga

kahāñ ehsān merī zaat par taqdīr kā hogā

huā gar kuchh mire haq meñ sila tadbīr kā hogā

mirī har shab guzar jaatī hai aksar is tamanna meñ

koī to ḳhvāb merī is na.ī ta.abīr kā hogā

buzurgoñ kā bhī saaya ab to sar se chhin gayā apne

ki ye bhī hādisa likkhā mirī taqdīr kā hogā

sabhī aurāq kahne ko to ham ne kar liye haiñ pur

tum aao to izāfa ik na.ī tahrīr kā hogā

dilāsa donoñ jānib se na.ī nasloñ ko miltā hai

na jaane mas.ala kab hal magar kashmīr kā hogā

vo jin bātoñ se ab tak munharif hote rahe 'saifī'

vahī unvāñ hamārī aaj phir taqrīr kā hogā

kahan ehsan meri zat par taqdir ka hoga

hua gar kuchh mere haq mein sila tadbir ka hoga

meri har shab guzar jati hai aksar is tamanna mein

koi to KHwab meri is nai tabir ka hoga

buzurgon ka bhi saya ab to sar se chhin gaya apne

ki ye bhi hadisa likkha meri taqdir ka hoga

sabhi auraq kahne ko to hum ne kar liye hain pur

tum aao to izafa ek nai tahrir ka hoga

dilasa donon jaanib se nai naslon ko milta hai

na jaane masala kab hal magar kashmir ka hoga

wo jin baaton se ab tak munharif hote rahe 'saifi'

wahi unwan hamari aaj phir taqrir ka hoga