kahan hai aisi zamin jis pe aasman na ho

kahāñ hai aisī zamīñ jis pe āsmān na ho

vo kaisā shahr jahāñ ek bhī makān na ho

hamāre dasht ne itnā to intizām rakkhā

saroñ pe dhuup rahe koī sā.ebān na ho

dil-o-dimāġh kī uljhan meñ ye kahāñ mumkin

ki zehn-o-dil to thakeñ ruuh ko thakān na ho

ḳhud apnī piiTh to ham thapthapā nahīñ sakte

hameñ hai ḳhauf ki bejā koī gumān na ho

maiñ ḳhvāb dekh rahā huuñ is ehtiyāt ke saath

itāb-e-sub.h se sapnā lahū-luhān na ho

zamīñ se duur chale aa.e haiñ magar 'bebāk'

duā karo ki yahīñ ḳhatm ye uḌaan na ho

kahan hai aisi zamin jis pe aasman na ho

wo kaisa shahr jahan ek bhi makan na ho

hamare dasht ne itna to intizam rakkha

saron pe dhup rahe koi saeban na ho

dil-o-dimagh ki uljhan mein ye kahan mumkin

ki zehn-o-dil to thaken ruh ko thakan na ho

KHud apni piTh to hum thapthapa nahin sakte

hamein hai KHauf ki beja koi guman na ho

main KHwab dekh raha hun is ehtiyat ke sath

itab-e-subh se sapna lahu-luhan na ho

zamin se dur chale aae hain magar 'bebak'

dua karo ki yahin KHatm ye uDan na ho