کہاں ہیں مخفی وہ شاہزادے جئے جو محلوں کی شان بن کر

کہاں ہیں مخفی وہ شاہزادے جئے جو محلوں کی شان بن کر

دلوں کی بستی بسا نہ پائے گئے تو اجڑا مکان بن کر

ہر ایک لمحہ حیات کا ہو چراغ حب نبی سے روشن

ثنائے رب میں ہی نیند آئے اٹھو سحر کی اذان بن کر

ہماری اردو نبی کی عربی سے مل کے شیر و شکر ہوئی ہے

یہاں کی مٹی میں خاک طیبہ بسی ہے مومن کی جان بن کر

گئے کہاں وہ جئے جو حق پر صدائے حق ہے وفات میں بھی

ہنوز ہم سن رہے ہیں ان کو گئے جو حق کا بیان بن کر

وہ شاخ گل جو قلم کی صورت بڑھی تھی آگے جڑیں جمانے

پہنچ نہ پائی زمین دل تک انا نے روکا چٹان بن کر

ہمارے بھارت کے سارے نیتا اگر سیاست نبی سے سیکھیں

چمک اٹھے گا جہاں میں سارے یہ ملک سچا مہان بن کر

یزیدیت سے مقابلہ ہے حسینی لشکر بنائے رکھو

روانگی بھی مثال کی ہو جیو نبی کے جوان بن کر

کسی نے مخفیؔ کیا بھروسہ وراثتوں کی حفاظتوں کا

یقیں میں مالک مجھے بدل دے مروں نہ جھوٹا گمان بن کر