کہاں جائے تری یادوں کی بارش کی گھڑی ہے

کہاں جائے تری یادوں کی بارش کی گھڑی ہے

اداسی شام بن کر دل کے آنگن میں کھڑی ہے

تعجب ہے ابھی سے کیسے ہمت ہار بیٹھے

اکیلی شام ہے اور رات بھی پوری پڑی ہے

نکل جاؤں گا اک دن تیری یادوں کے سحر سے

اگرچہ جانتا ہوں آزمائش یہ کڑی ہے

بچھڑ جانے کی اک بیگانہ و بے مہر ساعت

کسی خنجر کی صورت آج بھی دل میں گڑی ہے

سنی ہے داستان امت مرحوم ہم نے

بکھرتے موتیوں کی آج اک ٹوٹی لڑی ہے

عقیدت میں حقیقت کا سنہری رنگ بھرنے

ہر اک فرقے نے کوئی داستاں اپنی گڑھی ہے

بھلا دینا ہدایتؔ اس قدر مشکل نہ ہوتا

کسی کی یاد لیکن بات پر اپنی اڑی ہے