kahan jae teri yaadon ki barish ki ghaDi hai

kahāñ jaa.e tirī yādoñ kī bārish kī ghaḌī hai

udāsī shaam ban kar dil ke āñgan meñ khaḌī hai

ta.ajjub hai abhī se kaise himmat haar baiThe

akelī shaam hai aur raat bhī puurī paḌī hai

nikal jā.ūñgā ik din terī yādoñ ke sahar se

agarche jāntā huuñ āzmā.ish ye kaḌī hai

bichhaḌ jaane kī ik begāna-o-be-mehr saa.at

kisī ḳhanjar kī sūrat aaj bhī dil meñ gaḌī hai

sunī hai dāstān-e-ummat-e-marhūm ham ne

bikharte motiyoñ kī aaj ik TuuTī laḌī hai

aqīdat meñ haqīqat kā sunahrī rang bharne

har ik firqe ne koī dāstāñ apnī gaḌhī hai

bhulā denā 'hidāyat' is qadar mushkil na hotā

kisī kī yaad lekin baat par apnī aḌī hai

kahan jae teri yaadon ki barish ki ghaDi hai

udasi sham ban kar dil ke aangan mein khaDi hai

tajjub hai abhi se kaise himmat haar baiThe

akeli sham hai aur raat bhi puri paDi hai

nikal jaunga ek din teri yaadon ke sahar se

agarche jaanta hun aazmaish ye kaDi hai

bichhaD jaane ki ek begana-o-be-mehr saat

kisi KHanjar ki surat aaj bhi dil mein gaDi hai

suni hai dastan-e-ummat-e-marhum hum ne

bikharte motiyon ki aaj ek TuTi laDi hai

aqidat mein haqiqat ka sunahri rang bharne

har ek firqe ne koi dastan apni gaDhi hai

bhula dena 'hidayat' is qadar mushkil na hota

kisi ki yaad lekin baat par apni aDi hai