kahan jaega dard unki judai ka KHafa ho kar

kahāñ jā.egā dard un kī judā.ī kā ḳhafā ho kar

mire dil se nikal kar mere pahlū se judā ho kar

janāb-e-shaiḳh masjid meñ na baiTheñ pārsā ho kar

baqā hāsil kareñ us kī mohabbat meñ fanā ho kar

ta.ajjub hai butoñ ko baat karnā bhī nahīñ aatā

ḳhudā.ī meñ ḳhudā.ī karne baiThe haiñ ḳhudā ho kar

maiñ vo huuñ saḳht jo uf bhī na niklegī mire muñh se

jafāoñ par jafā.eñ jis qadar tū chāhtā ho kar

bajā kahte haiñ jo kahte haiñ tujh ko yār-e-harjā.ī

ki tū rahtā hai sab ke dil meñ sab kā āshnā ho kar

musībat meñ rahā karte haiñ jo bhī daana duniyā meñ

unhīñ ko pīstā hai charḳh-e-zālim āsiyā ho kar

tumhāre ham hamāre tum tumheñ kyā vāsta is se

adū ke āshnā kyuuñ ho hamāre āshnā ho kar

sar-e-mahfil jo mujh ko dekhte haiñ vo kan-āñkhiyoñ se

chhupī baiThī hai shoḳhī un kī āñkhoñ meñ hayā ho kar

sahar tak us ke sadmoñ se ho jāñ-bar ġhair mumkin hai

shab-e-furqat mire ghar aa.ī hai merī qazā ho kar

kahāñ tak shauq-e-nazzāra hai be-ḳhud ho ke ai 'sābir'

paḌā huuñ maiñ kisī kī rahguzar meñ naqsh-e-pā ho kar

janāb-e-dil kī bātoñ meñ na aanā dekh ai 'sābir'

ye hazrat rāh-e-ulfat meñ haiñ rahzan rahnumā ho kar

kahan jaega dard un ki judai ka KHafa ho kar

mere dil se nikal kar mere pahlu se juda ho kar

janab-e-shaiKH masjid mein na baiThen parsa ho kar

baqa hasil karen us ki mohabbat mein fana ho kar

tajjub hai buton ko baat karna bhi nahin aata

KHudai mein KHudai karne baiThe hain KHuda ho kar

main wo hun saKHt jo uf bhi na niklegi mere munh se

jafaon par jafaen jis qadar tu chahta ho kar

baja kahte hain jo kahte hain tujh ko yar-e-harjai

ki tu rahta hai sab ke dil mein sab ka aashna ho kar

musibat mein raha karte hain jo bhi dana duniya mein

unhin ko pista hai charKH-e-zalim aasiya ho kar

tumhaare hum hamare tum tumhein kya wasta is se

adu ke aashna kyun ho hamare aashna ho kar

sar-e-mahfil jo mujh ko dekhte hain wo kan-ankhiyon se

chhupi baiThi hai shoKHi un ki aankhon mein haya ho kar

sahar tak us ke sadmon se ho jaan-bar ghair mumkin hai

shab-e-furqat mere ghar aai hai meri qaza ho kar

kahan tak shauq-e-nazzara hai be-KHud ho ke ai 'sabir'

paDa hun main kisi ki rahguzar mein naqsh-e-pa ho kar

janab-e-dil ki baaton mein na aana dekh ai 'sabir'

ye hazrat rah-e-ulfat mein hain rahzan rahnuma ho kar