کہاں جاتے ہو مڑ کر وقت رخصت دیکھتے جاؤ

کہاں جاتے ہو مڑ کر وقت رخصت دیکھتے جاؤ

دکھا کر اپنی صورت میری صورت دیکھتے جاؤ

جو آئے ہو اڑا کر خاک تربت دیکھتے جاؤ

قیامت کیا کچھ آثار قیامت دیکھتے جاؤ

عدو سے لڑ کے مجھ سے لڑ رہی ہیں اب سر محفل

ذرا تم اپنی آنکھوں کی شرارت دیکھتے جاؤ

نہ پونچھو موڑ کر منہ میرے آنسو اپنے دامن سے

نہ پھیرو آنکھ تاثیر محبت دیکھتے جاؤ

چلے جاتے ہو منہ پھیرے ہوئے گور غریباں سے

بنا ہے ذرہ ذرہ چشم عبرت دیکھتے جاؤ

تمہیں معلوم تو ہو جائے دم کیسے نکلتا ہے

دم آخر ذرا صفدرؔ کی حالت دیکھتے جاؤ