kahan ka ranj-e-mohabbat koi alam bhi nahin

kahāñ kā ranj-e-mohabbat koī alam bhī nahīñ

vo mujh se duur huā is kā koī ġham bhī nahīñ

hamesha sunte ho tum bā-vafāoñ kī bāteñ

kabhī hamārī suno bevafā to ham bhī nahīñ

ġhamoñ kā daur to har ik ko gher letā hai

mirā jo ġham hai kisī aur se to kam bhī nahīñ

hamāre uzr-e-mohabbat pe taish khā ke kahā

sitam kiyā hai sitam ko kahā sitam bhī nahīñ

vo itnī baar sar-e-rāh mil ga.e 'māhir'

ye be-niyāzī kā aalam jabīñ pe ḳham bhī nahīñ

kahan ka ranj-e-mohabbat koi alam bhi nahin

wo mujh se dur hua is ka koi gham bhi nahin

hamesha sunte ho tum ba-wafaon ki baaten

kabhi hamari suno bewafa to hum bhi nahin

ghamon ka daur to har ek ko gher leta hai

mera jo gham hai kisi aur se to kam bhi nahin

hamare uzr-e-mohabbat pe taish kha ke kaha

sitam kiya hai sitam ko kaha sitam bhi nahin

wo itni bar sar-e-rah mil gae 'mahir'

ye be-niyazi ka aalam jabin pe KHam bhi nahin