kahan kahan na gai mehrban ki KHushbu

kahāñ kahāñ na ga.ī mehrbān kī ḳhushbū

zamāne bhar meñ hai urdu zabān kī ḳhushbū

badan se jis ghaḌī niklegī jaan kī ḳhushbū

milegī ḳhaak meñ tab ān-bān kī ḳhushbū

qadam bahakte haiñ jazbāt ke añdheroñ meñ

to khīñch laatī hai mujh ko makān kī ḳhushbū

jo haq ke vāste denā paḌe zamāne meñ

ajiib hotī hai is imtihān kī ḳhushbū

yahāñ pe pyaar hai yak-jehtī bhā.ī-chāra hai

baḌī hī ḳhuub hai hindostān kī ḳhushbū

javān hoñge jo sāzish kī god meñ fitne

kahāñ se aa.egī amn-o-amān kī ḳhushbū

vafā ḳhulūs diyānat hayā sadāqat pyaar

'nisār' ham bhī luTāte haiñ shaan kī ḳhushbū

kahan kahan na gai mehrban ki KHushbu

zamane bhar mein hai urdu zaban ki KHushbu

badan se jis ghaDi niklegi jaan ki KHushbu

milegi KHak mein tab aan-ban ki KHushbu

qadam bahakte hain jazbaat ke andheron mein

to khinch lati hai mujh ko makan ki KHushbu

jo haq ke waste dena paDe zamane mein

ajib hoti hai is imtihan ki KHushbu

yahan pe pyar hai yak-jehti bhai-chaara hai

baDi hi KHub hai hindostan ki KHushbu

jawan honge jo sazish ki god mein fitne

kahan se aaegi amn-o-aman ki KHushbu

wafa KHulus diyanat haya sadaqat pyar

'nisar' hum bhi luTate hain shan ki KHushbu