kahan kahan teri rangini-e-shabab nahin

kahāñ kahāñ tirī rañgīnī-e-shabāb nahīñ

mirā mazāq-e-nazar phir bhī kāmyāb nahīñ

kisī nazar meñ tumheñ dekhne kī taab nahīñ

naqāb-e-ruḳh bhī ulaT do to be-naqāb nahīñ

vo sun ke 'arz-e-tamannā ko ho ga.e ḳhāmosh

mire savāl kā shāyad koī javāb nahīñ

kuchh aur mast nigāhoñ se dekh ai saaqī

ba-qadr-e-zarf abhī nashsha-e-sharāb nahīñ

baḌe-baḌoñ ke qadam Dagmagā ga.e haiñ yahāñ

ye imtihān kā ik daur hai shabāb nahīñ

ḳhamosh baiThe haiñ jo pī chuke haiñ ḳhum ke ḳhum

bahak rahe haiñ jo ālūda-e-sharāb nahīñ

tumhārī hasrat-e-dīdār barqarār rahe

hazār saal bhī guzrīñ to kuchh hisāb nahīñ

lagī huī haiñ tumhārī taraf mirī āñkheñ

mirī nazar meñ zamāne kā inqalāb nahīñ

khulī huī tire aane ke intizār meñ haiñ

ḳhushā-nasīb vo āñkheñ jo mahv-e-ḳhvāb nahīñ

maiñ apne dost se kyā mujtanib huuñ ai 'shankar'

mujhe to apne 'adū se bhī ijtināb nahīñ

kahan kahan teri rangini-e-shabab nahin

mera mazaq-e-nazar phir bhi kaamyab nahin

kisi nazar mein tumhein dekhne ki tab nahin

naqab-e-ruKH bhi ulaT do to be-naqab nahin

wo sun ke 'arz-e-tamanna ko ho gae KHamosh

mere sawal ka shayad koi jawab nahin

kuchh aur mast nigahon se dekh ai saqi

ba-qadr-e-zarf abhi nashsha-e-sharab nahin

baDe-baDon ke qadam Dagmaga gae hain yahan

ye imtihan ka ek daur hai shabab nahin

KHamosh baiThe hain jo pi chuke hain KHum ke KHum

bahak rahe hain jo aaluda-e-sharab nahin

tumhaari hasrat-e-didar barqarar rahe

hazar sal bhi guzrin to kuchh hisab nahin

lagi hui hain tumhaari taraf meri aankhen

meri nazar mein zamane ka inqalab nahin

khuli hui tere aane ke intizar mein hain

KHusha-nasib wo aankhen jo mahw-e-KHwab nahin

main apne dost se kya mujtanib hun ai 'shankar'

mujhe to apne 'adu se bhi ijtinab nahin