kahan kahan tujhe DhunDun kahan kahan dekhun

kahāñ kahāñ tujhe DhūñDūñ kahāñ kahāñ dekhūñ

dikhā.ī kyoñ nahīñ detā hai maiñ jahāñ dekhūñ

fazā meñ phail rahā hai ab intishār bahut

na jaane kitne hī chehre dhuāñ dhuāñ dekhūñ

kisī ke sāmne zāhir na hoñ mire hālāt

ḳhudāyā tujh ko faqat faqat apnā rāz-dāñ dekhūñ

zamīñ pe phir kahīñ vahshat ne sar ubhārā hai

lahū ke rañg meñ phir aaj āsmāñ dekhūñ

ye aarzū ki mere ishq ko mile me.arāj

namāz-e-ishq paḌhūñ hijr-e-be-karāñ dekhūñ

bahār aa.egī dil ko hai ab yaqīn mire

ḳhayāl-o-ḳhvāb meñ phūloñ ke kārvāñ dekhūñ

banī hai dil meñ magar ruḳh se baat hai zāhir

'sadaf' ke chehre ko maiñ dil kā aa.ina dekhūñ

kahan kahan tujhe DhunDun kahan kahan dekhun

dikhai kyon nahin deta hai main jahan dekhun

faza mein phail raha hai ab intishaar bahut

na jaane kitne hi chehre dhuan dhuan dekhun

kisi ke samne zahir na hon mere haalat

KHudaya tujh ko faqat faqat apna raaz-dan dekhun

zamin pe phir kahin wahshat ne sar ubhaara hai

lahu ke rang mein phir aaj aasman dekhun

ye aarzu ki mere ishq ko mile mearaj

namaz-e-ishq paDhun hijr-e-be-karan dekhun

bahaar aaegi dil ko hai ab yaqin mere

KHayal-o-KHwab mein phulon ke karwan dekhun

bani hai dil mein magar ruKH se baat hai zahir

'sadaf' ke chehre ko main dil ka aaina dekhun