kahan ki aas mohabbat mein yas bhi na rahi

kahāñ kī aas mohabbat meñ yaas bhī na rahī

tire baġhair haqīqat meñ zindagī na rahī

shamīm-e-āriz-e-gul-rang se na rakh mahrūm

ki bū-e-gul pe kabhī qaid baaġh kī na rahī

unhīñ ke jalve the bikhre hue sar-e-mahfil

vo kyā uThe ki charāġhoñ meñ raushnī na rahī

nigāh-e-mast ko jab dil se vāsta na rahā

qadam qadam pe vo laġhzish vo be-ḳhudī na rahī

hameñ ḳhayāl thā mahshar meñ faisla hogā

milā ḳhudā se to us but meñ kāfirī na rahī

tumhārī mahfil-e-ishrat meñ ḳhaak shāmil hoñ

hamāre lab pe dikhāve kī bhī hañsī na rahī

atā ho phir vahī josh-e-junūn-e-dil merā

ki jab se dil ko sañbhālā hai zindagī na rahī

dil-e-harīs hī apnā na ho sakā qaane

vagarna tere karam meñ to kuchh kamī na rahī

sharāb talḳh sahī kuchh surūr to laa.ī

jafā meñ aap kī shāyad vo chāshnī na rahī

najāt mil ga.ī ai 'soz' ham ko jīte-jī

ki jab se qaid-e-alā.iq kī zindagī na rahī

kahan ki aas mohabbat mein yas bhi na rahi

tere baghair haqiqat mein zindagi na rahi

shamim-e-ariz-e-gul-rang se na rakh mahrum

ki bu-e-gul pe kabhi qaid bagh ki na rahi

unhin ke jalwe the bikhre hue sar-e-mahfil

wo kya uThe ki charaghon mein raushni na rahi

nigah-e-mast ko jab dil se wasta na raha

qadam qadam pe wo laghzish wo be-KHudi na rahi

hamein KHayal tha mahshar mein faisla hoga

mila KHuda se to us but mein kafiri na rahi

tumhaari mahfil-e-ishrat mein KHak shamil hon

hamare lab pe dikhawe ki bhi hansi na rahi

ata ho phir wahi josh-e-junun-e-dil mera

ki jab se dil ko sanbhaala hai zindagi na rahi

dil-e-haris hi apna na ho saka qane

wagarna tere karam mein to kuchh kami na rahi

sharab talKH sahi kuchh surur to lai

jafa mein aap ki shayad wo chashni na rahi

najat mil gai ai 'soz' hum ko jite-ji

ki jab se qaid-e-alaiq ki zindagi na rahi