kahan ki chaal nikali hai ye kahan ki tarah

kahāñ kī chaal nikālī hai ye kahāñ kī tarah

zamīñ pe chalne lage log āsmāñ kī tarah

tumhīñ batāo ki tāsīr is meñ kyā hogī

jo tum sunoge mirā haal dāstāñ kī tarah

shab-e-visāl bayāñ kyā kareñ ġham-e-hijrāñ

vo dard-e-dil ko bhī sunte haiñ dāstāñ kī tarah

dikhā rahā hai zamāne ko inqalāb kī shakl

badal rahā hai koī rang āsmāñ kī tarah

har ek baat mirī kaaT dī dam-e-taqrīr

chale na teġh bhī zālim tirī zabāñ kī tarah

khaḌe haiñ hashr meñ ḳhāmosh ahl-e-hashr tamām

kalām muñh se nikaltā nahīñ zabāñ kī tarah

falak vo chaal bhī ab chal ki ho mujhe taskīñ

ujaaḌ ḳhāna-e-sayyād āshiyāñ kī tarah

ḳhudā hī jaane ki rindoñ ne kyā kiyā 'mas.ūd'

janāb-e-shaiḳh ne fariyād kī azaañ kī tarah

kahan ki chaal nikali hai ye kahan ki tarah

zamin pe chalne lage log aasman ki tarah

tumhin batao ki tasir is mein kya hogi

jo tum sunoge mera haal dastan ki tarah

shab-e-visal bayan kya karen gham-e-hijran

wo dard-e-dil ko bhi sunte hain dastan ki tarah

dikha raha hai zamane ko inqalab ki shakl

badal raha hai koi rang aasman ki tarah

har ek baat meri kaT di dam-e-taqrir

chale na tegh bhi zalim teri zaban ki tarah

khaDe hain hashr mein KHamosh ahl-e-hashr tamam

kalam munh se nikalta nahin zaban ki tarah

falak wo chaal bhi ab chal ki ho mujhe taskin

ujaD KHana-e-sayyaad aashiyan ki tarah

KHuda hi jaane ki rindon ne kya kiya 'masud'

janab-e-shaiKH ne fariyaad ki azan ki tarah