کہاں لے جاؤں دل کو یا الٰہی

کہاں لے جاؤں دل کو یا الٰہی

گنہ ٹھہری ہے میری بے گناہی

پناہ ہر دو عالم بن گئی ہے

جنون عشق تیری بے پناہی

دلوں پر کر گئی ہے سحر کیا کیا

حسینوں کی ادائے کم نگاہی

یہ آہٹ ہے اسی سرو رواں کی

دل بیتاب دیتا ہے گواہی

تکلف برطرف یہ مے کدہ ہے

نہیں یاں راہ و رسم عذر خواہی

جگر کے ساتھ دنیائے ادب سے

ہوئی رخصت وہ شان کج کلاہی

مجازؔ اب لکھنؤ تجھ بن ہے سونا

فغان شب نہ آہ صبح گاہی

شعور منزل نو آج بھی ہے

تری لغزش تری گم کردہ راہی

مبارک ہو تجھے اے خانہ ویراں

جہان مے کدہ کی بادشاہی

گراں ہے تاج داران چمن پر

اسیران قفس کی داد خواہی

مآل حسرت تعمیر کیا ہے

جمالؔ اپنے بھرے گھر کی تباہی