kahan le jaun ummidon ki duniya bazm-e-imkan se

kahāñ le jā.ūñ ummīdoñ kī duniyā bazm-e-imkāñ se

ki qismat ko shikāyat hai farāvānī-e-hirmāñ se

milā hai vo gudāz-e-ishq-o-zauq-e-dard-e-jāñkāhī

fazā.eñ thartharātī haiñ mire jazbāt-e-pinhāñ se

mirī har saañs hai Duubī huī zahrāba-e-ġham meñ

hazar ai chārāgar andesha-hā-e-fikr-e-darmāñ se

tirā jalva to be-shak jalva bār-e-ām thā lekin

shikāyat kar rahā huuñ ḳhud maiñ apnī chashm-e-hairāñ se

ḳhudā-hāfiz tirā ai qalb-e-vīrāñ ab ḳhudā-hāfiz

ki mahrūmī ko merī dushmanī hai mere armāñ se

maiñ sadqe jalva-ārā tere zauq-e-ḳhud-numā.ī ke

murattab kar diyā hastī ko ajzā-e-pareshāñ se

maiñ vo lazzat-shanās-e-be-kasī huuñ gar mirā bas ho

badal luuñ sub.h-e-ishrat ko maiñ apnī shām-e-hijrāñ se

Thahar kar dekhtā jā be-kasī-e-ḳhāna-vīrānī

are o jaane vaale shaam ko gor-e-ġharībāñ se

har ik zarra hamārī dasht-paimā.ī kā shāhid hai

sunoge dāstāneñ tum har ik ḳhār-e-bayābāñ se

mujhe barbādī-e-hastī kī kuchh parvā nahīñ 'sāqib'

maiñ phir tartīb dūñgā dil ke ajzā-e-pareshāñ se

kahan le jaun ummidon ki duniya bazm-e-imkan se

ki qismat ko shikayat hai farawani-e-hirman se

mila hai wo gudaz-e-ishq-o-zauq-e-dard-e-jaankahi

fazaen thartharaati hain mere jazbaat-e-pinhan se

meri har sans hai Dubi hui zahraba-e-gham mein

hazar ai chaaragar andesha-ha-e-fikr-e-darman se

tera jalwa to be-shak jalwa bar-e-am tha lekin

shikayat kar raha hun KHud main apni chashm-e-hairan se

KHuda-hafiz tera ai qalb-e-viran ab KHuda-hafiz

ki mahrumi ko meri dushmani hai mere arman se

main sadqe jalwa-ara tere zauq-e-KHud-numai ke

murattab kar diya hasti ko ajza-e-pareshan se

main wo lazzat-shanas-e-be-kasi hun gar mera bas ho

badal lun subh-e-ishrat ko main apni sham-e-hijran se

Thahar kar dekhta ja be-kasi-e-KHana-virani

are o jaane wale sham ko gor-e-ghariban se

har ek zarra hamari dasht-paimai ka shahid hai

sunoge dastanen tum har ek KHar-e-bayaban se

mujhe barbaadi-e-hasti ki kuchh parwa nahin 'saqib'

main phir tartib dunga dil ke ajza-e-pareshan se