kahan na-jaane chala gaya intizar kar ke

kahāñ na-jāne chalā gayā intizār kar ke

yahāñ bhī hotā thā ek mausam-e-bahār kar ke

jo ham pe aisā na kār-e-duniyā kā jabr hotā

to ham bhī rahte yahāñ junūñ iḳhtiyār kar ke

na-jāne kis samt jā basī bād-e-yād-parvar

hamāre atrāf ḳhushbuoñ kā hisār kar ke

kaTeñgī kis din madār-o-mehvar kī ye tanābeñ

ki thak ga.e ham hisāb-e-lail-o-nahār kar ke

tirī haqīqat-pasand duniyā meñ aa base haiñ

ham apne ḳhvāboñ kī saarī raunaq nisār kar ke

ye dil to siine meñ kis qarīne se gūñjtā thā

ajiib hañgāma kar diyā be-qarār kar ke

har ek manzar har ek ḳhalvat gañvā chuke haiñ

ham ek mahfil kī yaad par inhisār kar ke

tamām lamhe vazāhatoñ meñ guzar ga.e haiñ

hamārī āñkhoñ meñ ik suḳhan ko ġhubār kar ke

ye ab khulā hai ki us meñ motī bhī DhūñDte the

ki ham to bas aa ga.e haiñ dariyā ko paar kar ke

ba-qadr-e-ḳhvāb-e-talab lahū hai na zindagī hai

adā karoge kahāñ se itnā udhār kar ke

kahan na-jaane chala gaya intizar kar ke

yahan bhi hota tha ek mausam-e-bahaar kar ke

jo hum pe aisa na kar-e-duniya ka jabr hota

to hum bhi rahte yahan junun iKHtiyar kar ke

na-jaane kis samt ja basi baad-e-yaad-parwar

hamare atraf KHushbuon ka hisar kar ke

kaTengi kis din madar-o-mehwar ki ye tanaben

ki thak gae hum hisab-e-lail-o-nahaar kar ke

teri haqiqat-pasand duniya mein aa base hain

hum apne KHwabon ki sari raunaq nisar kar ke

ye dil to sine mein kis qarine se gunjta tha

ajib hangama kar diya be-qarar kar ke

har ek manzar har ek KHalwat ganwa chuke hain

hum ek mahfil ki yaad par inhisar kar ke

tamam lamhe wazahaton mein guzar gae hain

hamari aankhon mein ek suKHan ko ghubar kar ke

ye ab khula hai ki us mein moti bhi DhunDte the

ki hum to bas aa gae hain dariya ko par kar ke

ba-qadr-e-KHwab-e-talab lahu hai na zindagi hai

ada karoge kahan se itna udhaar kar ke