kahan nasib wo kaifiyyat-e-dawam abhi

kahāñ nasīb vo kaifiyyat-e-davām abhī

ki mai-kashī hai ba-qaid-e-subū-o-jām abhī

havās-o-hosh ko kahiye mirā salām abhī

junūñ ko aql se lenā hai intiqām abhī

na jā sakegī vahāñ tak nigāh-e-ām abhī

mirā mazāq bahut hai buland-bām abhī

kuchh aur lījiye dār-o-rasan se kaam abhī

junūñ kā josh hai phailā huā tamām abhī

ḳhushī kahāñ ki ḳhushī kā nahīñ maqām abhī

na merī sub.h abhī hai na merī shaam abhī

usī tarah se hai be-rabtī-e-kalām abhī

fuġhāñ bhī aa.ī hai lab par to nā-tamām abhī

hai ahl-e-hosh kā kuchh aur hī payām abhī

magar mujhe to hai dīvāna-pan se kaam abhī

jahāñ meñ aane ko aa.e to inqalāb bahut

badal sakī na sahar se hamārī shaam abhī

usī ko hāsil-e-umr-e-vafā banānā hai

jo ik ḳhalish sī hai dil meñ barā.e naam abhī

yahāñ to din ko bhī tārīkiyāñ barastī haiñ

hamārī sub.h se achchhī hai un kī shaam abhī

kahan nasib wo kaifiyyat-e-dawam abhi

ki mai-kashi hai ba-qaid-e-subu-o-jam abhi

hawas-o-hosh ko kahiye mera salam abhi

junun ko aql se lena hai intiqam abhi

na ja sakegi wahan tak nigah-e-am abhi

mera mazaq bahut hai buland-baam abhi

kuchh aur lijiye dar-o-rasan se kaam abhi

junun ka josh hai phaila hua tamam abhi

KHushi kahan ki KHushi ka nahin maqam abhi

na meri subh abhi hai na meri sham abhi

usi tarah se hai be-rabti-e-kalam abhi

fughan bhi aai hai lab par to na-tamam abhi

hai ahl-e-hosh ka kuchh aur hi payam abhi

magar mujhe to hai diwana-pan se kaam abhi

jahan mein aane ko aae to inqalab bahut

badal saki na sahar se hamari sham abhi

usi ko hasil-e-umr-e-wafa banana hai

jo ek KHalish si hai dil mein barae nam abhi

yahan to din ko bhi tarikiyan barasti hain

hamari subh se achchhi hai un ki sham abhi