kahan qarar hai kahne ko dil qarar mein hai

kahāñ qarār hai kahne ko dil qarār meñ hai

jo thī ḳhizāñ meñ vahī kaifiyat bahār meñ hai

chaman kī ḳhair ho kyā hai jo aaj har taa.ir

paroñ ko apne sameTe hue bahār meñ hai

ab aisā jiinā bhī jiine meñ koī jiinā hai

na aap bas meñ na dil apne iḳhtiyār meñ hai

chaman meñ the to satātī thī fikr-e-dāna-o-dām

qafas meñ haiñ to dil aTkā huā bahār meñ hai

kahīñ khulī to nahīñ zulf-e-ḳham-ba-ḳham us kī

ik iztirāb kā 'ālam mire ġhubār meñ hai

vo dil-farebī-e-rang-e-bahār kyā jaane

ki jis kā hosh Thikāne nahīñ bahār meñ hai

isī kā naam hai shoḳhī to iztirāb hai kyā

kisī ke dil kā talātum nigāh-e-yār meñ hai

chaman meñ aa hī ga.e haiñ to muskurā diije

kalī bhī aap ke hañsne ke intizār meñ hai

idhar bhī ek uchaTtī nazar ḳhudā ke liye

khaḌā huā koī pahroñ se intizār meñ hai

qadam qadam pe to hai sāmnā qayāmat kā

zamāna phir bhī qayāmat ke intizār meñ hai

yahāñ to zuhd kā dāman bhī chaak hai 'bismil'

yahāñ mirā dil-e-dīvāna kis shumār meñ hai

kahan qarar hai kahne ko dil qarar mein hai

jo thi KHizan mein wahi kaifiyat bahaar mein hai

chaman ki KHair ho kya hai jo aaj har tair

paron ko apne sameTe hue bahaar mein hai

ab aisa jina bhi jine mein koi jina hai

na aap bas mein na dil apne iKHtiyar mein hai

chaman mein the to satati thi fikr-e-dana-o-dam

qafas mein hain to dil aTka hua bahaar mein hai

kahin khuli to nahin zulf-e-KHam-ba-KHam us ki

ek iztirab ka 'alam mere ghubar mein hai

wo dil-farebi-e-rang-e-bahaar kya jaane

ki jis ka hosh Thikane nahin bahaar mein hai

isi ka nam hai shoKHi to iztirab hai kya

kisi ke dil ka talatum nigah-e-yar mein hai

chaman mein aa hi gae hain to muskura dije

kali bhi aap ke hansne ke intizar mein hai

idhar bhi ek uchaTti nazar KHuda ke liye

khaDa hua koi pahron se intizar mein hai

qadam qadam pe to hai samna qayamat ka

zamana phir bhi qayamat ke intizar mein hai

yahan to zuhd ka daman bhi chaak hai 'bismil'

yahan mera dil-e-diwana kis shumar mein hai