kahan sawab kahan kya azab hota hai

kahāñ savāb kahāñ kyā azaab hotā hai

mohabbatoñ meñ kab itnā hisāb hotā hai

bichhaḌ ke mujh se tum apnī kashish na kho denā

udaas rahne se chehrā ḳharāb hotā hai

use patā hī nahīñ hai ki pyaar kī baazī

jo haar jaa.e vahī kāmyāb hotā hai

jab us ke paas gañvāne ko kuchh nahīñ hotā

to koī aaj kā izzat-ma.āb hotā hai

jise maiñ likhtā huuñ aise ki ḳhud hī paḌh paañv

kitāb-e-zīst meñ aisā bhī baab hotā hai

bahut bharosa na kar lenā apnī āñkhoñ par

dikhā.ī detā hai jo kuchh vo ḳhvāb hotā hai

kahan sawab kahan kya azab hota hai

mohabbaton mein kab itna hisab hota hai

bichhaD ke mujh se tum apni kashish na kho dena

udas rahne se chehra KHarab hota hai

use pata hi nahin hai ki pyar ki bazi

jo haar jae wahi kaamyab hota hai

jab us ke pas ganwane ko kuchh nahin hota

to koi aaj ka izzat-maab hota hai

jise main likhta hun aise ki KHud hi paDh panw

kitab-e-zist mein aisa bhi bab hota hai

bahut bharosa na kar lena apni aankhon par

dikhai deta hai jo kuchh wo KHwab hota hai