kahan se aana hai har aadmi yahan tanha

kahāñ se aanā hai har aadmī yahāñ tanhā

rulā ke ham ko chalā jaanā hai kahāñ tanhā

yazīd-e-asr ne gherā hai yuuñ mujhe jaise

muqāble meñ ho ik tere be-kamāñ tanhā

lage haiñ ḳheme vahīñ aaj kārvānoñ ke

gayā thā shahr meñ thak kar jahāñ jahāñ tanhā

ye kaun rahtā hai saa.e kī tarah saath mire

rah-e-talab meñ to maiñ huuñ ravāñ-davāñ tanhā

jo dekhiye mire hamdam haiñ mere saath magar

uThā rahā huuñ maiñ bār-e-ġham-e-jahāñ tanhā

suno jo kahte haiñ sargoshiyoñ meñ shahr ke log

amīr-e-shahr se kab maiñ huuñ bad-gumāñ tanhā

bujhāo jald tumhārī bhī varna ḳhair nahīñ

kabhī jalā hai chaman meñ ik āshiyāñ tanhā

ḳhalish kisī kā sahārā bane koī kyuuñ kar

yahāñ har ek kā honā hai imtihāñ tanhā

kahan se aana hai har aadmi yahan tanha

rula ke hum ko chala jaana hai kahan tanha

yazid-e-asr ne ghera hai yun mujhe jaise

muqable mein ho ek tere be-kaman tanha

lage hain KHeme wahin aaj karwanon ke

gaya tha shahr mein thak kar jahan jahan tanha

ye kaun rahta hai sae ki tarah sath mere

rah-e-talab mein to main hun rawan-dawan tanha

jo dekhiye mere hamdam hain mere sath magar

uTha raha hun main bar-e-gham-e-jahan tanha

suno jo kahte hain sargoshiyon mein shahr ke log

amir-e-shahr se kab main hun bad-guman tanha

bujhao jald tumhaari bhi warna KHair nahin

kabhi jala hai chaman mein ek aashiyan tanha

KHalish kisi ka sahaara bane koi kyun kar

yahan har ek ka hona hai imtihan tanha