kahan se laenge aansu aza-dari ke mausam mein

kahāñ se lā.eñge aañsū azā-dārī ke mausam meñ

bahut kuchh ro chuke ham to adākārī ke mausam meñ

utar ā.ūñgā maiñ bhī zīna-e-hastī se yuuñ ik din

ki jaise rañg-e-ruḳh utre hai nādārī ke mausam meñ

tumhāre ḳhat kabhī paḌhnā kabhī tartīb se rakhnā

ajab mashġhūliyat rahtī hai bekārī ke mausam meñ

ba-juz mere zamāne kī qabā rañgīn kar Daalī

ye kyā tafrīq rakkhī us ne gul-kārī ke mausam meñ

sar-e-barg-e-tamannā marham-e-dīdār kah jaa.eñ

na aa.eñ sāmne mere nigah-dārī ke mausam meñ

tulū-e-mehr se TūTegī un kī niiñd nā-mumkin

jo ḳhvābīda rahā karte haiñ bedārī ke mausam meñ

taras khāte haiñ kyuuñ ahbāb mere haal par 'aḳhtar'

bahut be-chainiyāñ baḌhtī haiñ ġham-ḳhvārī ke mausam meñ

kahan se laenge aansu aza-dari ke mausam mein

bahut kuchh ro chuke hum to adakari ke mausam mein

utar aaunga main bhi zina-e-hasti se yun ek din

ki jaise rang-e-ruKH utre hai nadari ke mausam mein

tumhaare KHat kabhi paDhna kabhi tartib se rakhna

ajab mashghuliyat rahti hai bekari ke mausam mein

ba-juz mere zamane ki qaba rangin kar Dali

ye kya tafriq rakkhi us ne gul-kari ke mausam mein

sar-e-barg-e-tamanna marham-e-didar kah jaen

na aaen samne mere nigah-dari ke mausam mein

tulu-e-mehr se TuTegi un ki nind na-mumkin

jo KHwabida raha karte hain bedari ke mausam mein

taras khate hain kyun ahbab mere haal par 'aKHtar'

bahut be-chainiyan baDhti hain gham-KHwari ke mausam mein