kahan sunta hai wo rudad meri

kahāñ suntā hai vo rūdād merī

rahegī gūñjtī fariyād merī

sitāre Dhal rahe haiñ saath mere

kaTī ik aur shab barbād merī

maiñ ‘aql-e-nā-rasā kā kyā karūñgā

rahe dīvāngī ābād merī

bahut rusvā rahegā naam terā

sadā jab tak rahī āzād merī

yahāñ maiñ qātiloñ meñ ghir gayā huuñ

ḳhudāyā jald kar imdād merī

ye merī saltanat ye merī shāhī

yahīñ pe masnad-e-irshād merī

maiñ ruḳhsat ho rahā huuñ shahr-e-jāñ se

yahāñ rakkhī rahegī yaad merī

maiñ bujh kar raakh hotā jā rahā huuñ

sahar tak thī faqat mī'ād merī

shikasta hai tirī shamshīr lekin

jabīñ par ḳham nahīñ jallād merī

nahīñ 'hammād' maiñ is aa.ine meñ

koī tasvīr hai ham-zād merī

kahan sunta hai wo rudad meri

rahegi gunjti fariyaad meri

sitare Dhal rahe hain sath mere

kaTi ek aur shab barbaad meri

main ‘aql-e-na-rasa ka kya karunga

rahe diwangi aabaad meri

bahut ruswa rahega nam tera

sada jab tak rahi aazad meri

yahan main qatilon mein ghir gaya hun

KHudaya jald kar imdad meri

ye meri saltanat ye meri shahi

yahin pe masnad-e-irshad meri

main ruKHsat ho raha hun shahr-e-jaan se

yahan rakkhi rahegi yaad meri

main bujh kar rakh hota ja raha hun

sahar tak thi faqat mi'ad meri

shikasta hai teri shamshir lekin

jabin par KHam nahin jallad meri

nahin 'hammad' main is aaine mein

koi taswir hai ham-zad meri