kahan tak zabt karta be-KHudi se aashna ho kar

kahāñ tak zabt kartā be-ḳhudī se āshnā ho kar

naqāb-e-rāz maiñ ne bhī ulaT dī lab-kushā ho kar

hayāt-e-ishq kī har saañs sarf-e-justujū kar de

latāfat dil kī zaa.il kar na manzil āshnā ho kar

ḳhudā ma.alūm us kī justujū mujh ko kahāñ laa.ī

ki ḳhud bhī kho gayā huuñ apne markaz se judā ho kar

fazā-e-dahr kar dī pur-sukūñ kaif-e-tarannum se

kisī ne parda-e-har-sāz se naġhma-sarā ho kar

badal dī husn kī fitrat mirī shān-e-taḳhayyul ne

vo majbūr-e-karam ḳhud ho ga.e sabr-āzmā ho kar

mujhe is ālam-e-hairat meñ laa.e haiñ tire jalve

ki terā ā.īna maiñ ban gayā huuñ ḳhud-numā ho kar

mujhe is be-niyāzī par na de ilzām-e-ḳhuddārī

ki aayā huuñ azal se nā-shanās-e-mudda.ā ho kar

kahan tak zabt karta be-KHudi se aashna ho kar

naqab-e-raaz main ne bhi ulaT di lab-kusha ho kar

hayat-e-ishq ki har sans sarf-e-justuju kar de

latafat dil ki zail kar na manzil aashna ho kar

KHuda malum us ki justuju mujh ko kahan lai

ki KHud bhi kho gaya hun apne markaz se juda ho kar

faza-e-dahr kar di pur-sukun kaif-e-tarannum se

kisi ne parda-e-har-saz se naghma-sara ho kar

badal di husn ki fitrat meri shan-e-taKHayyul ne

wo majbur-e-karam KHud ho gae sabr-azma ho kar

mujhe is aalam-e-hairat mein lae hain tere jalwe

ki tera aaina main ban gaya hun KHud-numa ho kar

mujhe is be-niyazi par na de ilzam-e-KHuddari

ki aaya hun azal se na-shanas-e-muddaa ho kar