kahan the shab idhar dekho haya kyun hai nigahon mein

kahāñ the shab idhar dekho hayā kyuuñ hai nigāhoñ meñ

agar manzūr hai rakh lo mujhe jhūTe gavāhoñ meñ

muvahhid vo huuñ gar maiñ sirr-e-vahdat kaan meñ kah duuñ

muazzin but-kade meñ hoñ barahman ḳhānqāhoñ meñ

nazar mujh se churā kar muñh chhupā kar kahte jaate haiñ

ki ye chorī bhī likkhī jā.egī tere gunāhoñ meñ

siyahkārī mirī ban jaa.e rashk-e-gesū-e-ḳhūbāñ

qayāmat ko chhupā baiThā rahūñ yārab gunāhoñ meñ

vahī 'rāsiḳh' to haiñ kal tak jo maiḳhāne ke darbāñ the

bane baiThe haiñ hazrat chaar din se dīñ-panāhoñ meñ

kahan the shab idhar dekho haya kyun hai nigahon mein

agar manzur hai rakh lo mujhe jhuTe gawahon mein

muwahhid wo hun gar main sirr-e-wahdat kan mein kah dun

muazzin but-kade mein hon barahman KHanqahon mein

nazar mujh se chura kar munh chhupa kar kahte jate hain

ki ye chori bhi likkhi jaegi tere gunahon mein

siyahkari meri ban jae rashk-e-gesu-e-KHuban

qayamat ko chhupa baiTha rahun yarab gunahon mein

wahi 'rasiKH' to hain kal tak jo maiKHane ke darban the

bane baiThe hain hazrat chaar din se din-panahon mein