کہاں وہ سیم تناں ہیں کہاں وہ گل بدناں

کہاں وہ سیم تناں ہیں کہاں وہ گل بدناں

عزیز از دل و جاں ہے حدیث لالہ رخاں

یہ ہم سے پوچھو جلال و جمال کیا شے ہے

ہمارے گرد رہا ہے ہجوم ماہ وشاں

مری نگاہ کو ہے دید کی کہاں فرصت

ہیں یوں تو جلوے ہی جلوے فضا میں رقص کناں

سکوں ہے کار گہ زیست میں کہاں یارو

کشاں کشاں لئے پھرتی ہے گردش دوراں

یہاں تو سانس بھی لینے میں احتیاط ہے شرط

بقول میرؔ یہ ہے کار گاہ شیشہ گراں

حبابؔ اپنے وطن سے تو دور ہوں لیکن

نگاہ میں ہیں سبھی دوستان زندہ دلاں