kahani jis ki thi uske hi jaisa ho gaya tha main

kahānī jis kī thī us ke hī jaisā ho gayā thā maiñ

tamāsha karte karte ḳhud tamāsha ho gayā thā maiñ

na merā naam thā na daam bāzār-e-mohabbat meñ

bas us ne bhaav pūchhā aur mahñgā ho gayā thā maiñ

ka.ī din tak use dekhā nahīñ jab us kī khiḌkī par

to apnī āñkhoñ meñ khiḌkī kā parda ho gayā thā maiñ

bichhaḌ kar us se tanhā.ī kā vo 'ālam rahā mujh meñ

ki ik din aa.ine meñ us kā chehra ho gayā thā maiñ

bujhā to ḳhud meñ ik chingārī bhī baaqī nahīñ rakkhī

use taara banāne meñ añdherā ho gayā thā maiñ

bitā dī 'umr maiñ ne us kī ik āvāz sunñe meñ

use jab bolnā aaya to bahra ho gayā thā maiñ

bahut din baa'd vo ik din bichhaḌ kar phir milā mujh ko

magar is baar milte hī akelā ho gayā thā maiñ

vo dushman dost ban kar ghaat meñ thā achchhe mauqe kī

patā us din chalā jis din nihattā ho gayā thā maiñ

so ḳhud ko DhūñD kar ik roz golī maar dī maiñ ne

jise chāhā usī kī jaañ kā ḳhatra ho gayā thā maiñ

kahani jis ki thi us ke hi jaisa ho gaya tha main

tamasha karte karte KHud tamasha ho gaya tha main

na mera nam tha na dam bazar-e-mohabbat mein

bas us ne bhaw puchha aur mahnga ho gaya tha main

kai din tak use dekha nahin jab us ki khiDki par

to apni aankhon mein khiDki ka parda ho gaya tha main

bichhaD kar us se tanhai ka wo 'alam raha mujh mein

ki ek din aaine mein us ka chehra ho gaya tha main

bujha to KHud mein ek chingari bhi baqi nahin rakkhi

use tara banane mein andhera ho gaya tha main

bita di 'umr main ne us ki ek aawaz sunne mein

use jab bolna aaya to bahra ho gaya tha main

bahut din ba'd wo ek din bichhaD kar phir mila mujh ko

magar is bar milte hi akela ho gaya tha main

wo dushman dost ban kar ghat mein tha achchhe mauqe ki

pata us din chala jis din nihatta ho gaya tha main

so KHud ko DhunD kar ek roz goli mar di main ne

jise chaha usi ki jaan ka KHatra ho gaya tha main