kahani to muammai nahin hai

kahānī to mu'ammā.ī nahīñ hai

tujhe shāyad samajh aa.ī nahīñ hai

take jaatā huuñ ab bhī terā rasta

bhale āñkhoñ meñ bīnā.ī nahīñ hai

abhī paise ikaTThe kar rahā huuñ

abhī tasvīr banvā.ī nahīñ hai

abhī se mutma.in honā burā hai

abhī manzil nazar aa.ī nahīñ hai

ġhazal kahne ko āmāda haiñ lekin

abhī tasvīr ban paa.ī nahīñ hai

baroz-e-‘īd us ke ghar hai faaqa

qabā maiñ ne bhī silvā.ī nahīñ hai

abhī is vāste ḳhāmosh huuñ maiñ

abhī 'izzat pe ban aa.ī nahīñ hai

rah-e-ulfat se tum ghabrā rahe ho

ye shauq-e-ābla-pā.ī nahīñ hai

haiñ kis vahm-o-gumāñ meñ aap 'az.har'

mohabbat alf-lailā.ī nahīñ hai

kahani to mu'ammai nahin hai

tujhe shayad samajh aai nahin hai

take jata hun ab bhi tera rasta

bhale aankhon mein binai nahin hai

abhi paise ikaTThe kar raha hun

abhi taswir banwai nahin hai

abhi se mutmain hona bura hai

abhi manzil nazar aai nahin hai

ghazal kahne ko aamada hain lekin

abhi taswir ban pai nahin hai

baroz-e-‘id us ke ghar hai faqa

qaba main ne bhi silwai nahin hai

abhi is waste KHamosh hun main

abhi 'izzat pe ban aai nahin hai

rah-e-ulfat se tum ghabra rahe ho

ye shauq-e-abla-pai nahin hai

hain kis wahm-o-guman mein aap 'azhar'

mohabbat alf-lailai nahin hai