کہانی یا کوئی قصہ نہیں ہے

کہانی یا کوئی قصہ نہیں ہے

ترے جیسا کوئی چہرہ نہیں ہے

گہر ہوں لعل ہوں میں یا کہ پتھر

کسی نے آج تک پرکھا نہیں ہے

صلیب و دار سے سب ڈر رہے ہیں

یہاں پر سچ کوئی کہتا نہیں ہے

پرایوں سے بھلا شکوہ گلہ کیا

مجھے اپنوں نے ہی سمجھا نہیں ہے

ہر اک سو ابر ظلمت ہے برستا

کہیں رحمت کی اب برکھا نہیں ہے

بلندی پر بہت اترا رہے ہو

کوئی بھی جا کے واں ٹھہرا نہیں ہے

محبت کو وہ کیا سمجھے گا صارمؔ

جو اس رہ سے کبھی گزرا نہیں ہے