kahani ya koi qissa nahin hai

kahānī yā koī qissa nahīñ hai

tire jaisā koī chehra nahīñ hai

guhar huuñ la.al huuñ maiñ yā ki patthar

kisī ne aaj tak parkhā nahīñ hai

salīb-o-dār se sab Dar rahe haiñ

yahāñ par sach koī kahtā nahīñ hai

parāyoñ se bhalā shikva gila kyā

mujhe apnoñ ne hī samjhā nahīñ hai

har-ik sū abr-e-zulmat hai barastā

kahīñ rahmat kī ab barkhā nahīñ hai

bulandī par bahut itrā rahe ho

koī bhī jā ke vaañ Thahrā nahīñ hai

mohabbat ko vo kyā samjhegā 'sārim'

jo is rah se kabhī guzrā nahīñ hai

kahani ya koi qissa nahin hai

tere jaisa koi chehra nahin hai

guhar hun lal hun main ya ki patthar

kisi ne aaj tak parkha nahin hai

salib-o-dar se sab Dar rahe hain

yahan par sach koi kahta nahin hai

parayon se bhala shikwa gila kya

mujhe apnon ne hi samjha nahin hai

har-ik su abr-e-zulmat hai barasta

kahin rahmat ki ab barkha nahin hai

bulandi par bahut itra rahe ho

koi bhi ja ke wan Thahra nahin hai

mohabbat ko wo kya samjhega 'sarim'

jo is rah se kabhi guzra nahin hai