کہیں بھی حد نظر تک نظر نہیں آئے

کہیں بھی حد نظر تک نظر نہیں آئے

ہماری سمت وہ آئے مگر نہیں آئے

نکل پڑے تری دھن میں ترے اشارے پر

وگرنہ خواب تو ہم کو نظر نہیں آئے

ہمیں بلائے گئے دار ہو کہ مقتل ہو

ترے پیام بہ نام دگر نہیں آئے

افق کے پار بھی چھپنا محال تھا تیرا

ہوئی یہ خیر کہ ہم لوگ ادھر نہیں آئے

ہمیں چمن کی جدائی نہ کیوں گراں گزرے

ہم آبروئے چمن بیچ کر نہیں آئے

میں ان سے دور بھی رہ کر نظر کی زد میں رہا

وہ میرے پاس رہے اور نظر نہیں آئے

بہت دنوں سے ہے سونی رہ وفا بسملؔ

بہت دنوں سے مسافر نظر نہیں آئے