kahin bhi hadd-e-nazar tak nazar nahin aae

kahīñ bhī hadd-e-nazar tak nazar nahīñ aa.e

hamārī samt vo aa.e magar nahīñ aa.e

nikal paḌe tirī dhun meñ tire ishāre par

vagarna ḳhvāb to ham ko nazar nahīñ aa.e

hamīñ bulā.e ga.e daar ho ki maqtal ho

tire payām ba-nām-e-digar nahīñ aa.e

ufuq ke paar bhī chhupnā muhāl thā terā

huī ye ḳhair ki ham log udhar nahīñ aa.e

hameñ chaman kī judā.ī na kyoñ girāñ guzre

ham ābrū-e-chaman bech kar nahīñ aa.e

maiñ un se duur bhī rah kar nazar kī zad meñ rahā

vo mere paas rahe aur nazar nahīñ aa.e

bahut dinoñ se hai suunī rah-e-vafā 'bismil'

bahut dinoñ se musāfir nazar nahīñ aa.e

kahin bhi hadd-e-nazar tak nazar nahin aae

hamari samt wo aae magar nahin aae

nikal paDe teri dhun mein tere ishaare par

wagarna KHwab to hum ko nazar nahin aae

hamin bulae gae dar ho ki maqtal ho

tere payam ba-nam-e-digar nahin aae

ufuq ke par bhi chhupna muhaal tha tera

hui ye KHair ki hum log udhar nahin aae

hamein chaman ki judai na kyon giran guzre

hum aabru-e-chaman bech kar nahin aae

main un se dur bhi rah kar nazar ki zad mein raha

wo mere pas rahe aur nazar nahin aae

bahut dinon se hai suni rah-e-wafa 'bismil'

bahut dinon se musafir nazar nahin aae