kahin charaghon ko nind aae kahin pe rabt-e-hijab TuTe

kahīñ charāġhoñ ko niiñd aa.e kahīñ pe rabt-e-hijāb TuuTe

kisī kī āñkhoñ kī jaage qismat kisī kā band-e-naqāb TuuTe

tumhārī āñkhoñ ke sāmne hī hamārī āñkhoñ kā ḳhvāb TuuTe

fazā kī rañgīn titliyoñ kī nazar se shāḳh-e-gulāb TuuTe

dayār-e-shab ke the sab musāfir sukūt-e-shab to sabhī ne toḌā

to muntaḳhab ik hamī hoñ kaahe hamī pe kyoñ ye azaab TuuTe

na kar jabīn-e-ḳhiyām zaḳhmī na sah azāboñ kī dhuup sar pe

na kar havāoñ kī parvarish yuuñ ki zor-āvar tanāb TuuTe

vo jis kī miTTī meñ pal rahe the shagūfe amn-o-amāñ ke logo

usī pe barsā lahū kā bādal usī pe saare azaab TuuTe

'asad' ghaTā.eñ ye tīrgī kī tabhī chhaTeñgī ki jab falak par

kisī ke māthe kā chāñd chamke kisī nazar kā shahāb TuuTe

kahin charaghon ko nind aae kahin pe rabt-e-hijab TuTe

kisi ki aankhon ki jage qismat kisi ka band-e-naqab TuTe

tumhaari aankhon ke samne hi hamari aankhon ka KHwab TuTe

faza ki rangin titliyon ki nazar se shaKH-e-gulab TuTe

dayar-e-shab ke the sab musafir sukut-e-shab to sabhi ne toDa

to muntaKHab ek hami hon kahe hami pe kyon ye azab TuTe

na kar jabin-e-KHiyam zaKHmi na sah azabon ki dhup sar pe

na kar hawaon ki parwarish yun ki zor-awar tanab TuTe

wo jis ki miTTi mein pal rahe the shagufe amn-o-aman ke logo

usi pe barsa lahu ka baadal usi pe sare azab TuTe

'asad' ghaTaen ye tirgi ki tabhi chhaTengi ki jab falak par

kisi ke mathe ka chand chamke kisi nazar ka shahab TuTe