کہیں فرد سے انجمن بن گیا ہوں

کہیں فرد سے انجمن بن گیا ہوں

کہیں انجمن میں اکیلا ملا ہوں

اجالوں کا انداز پہچانتا ہوں

اندھیروں میں پل کر نکھر سا گیا ہوں

زمانے سے کہہ دو ادھر سے نہ گزرے

میں زلفوں کی چھاؤں میں سستا رہا ہوں

یہ کیسا سفر ہے یہ کیسی ہیں راہیں

جہاں سے چلا تھا وہیں آ گیا ہوں

وہیں آئی ہے مجھ کو لینے کو منزل

جہاں تھک کے میں راہ میں گر پڑا ہوں

افق سے پرے دور حد نظر تک

نہ ہو ختم جو میں وہی راستا ہوں

زمان و مکاں کی حدوں سے گزر کر

خدا جانے آ کر کہاں میں رکا ہوں