kahin fard se anjuman ban gaya hun

kahīñ fard se anjuman ban gayā huuñ

kahīñ anjuman meñ akelā milā huuñ

ujāloñ kā andāz pahchāntā huuñ

añdheroñ meñ pal kar nikhar sā gayā huuñ

zamāne se kah do idhar se na guzre

maiñ zulfoñ kī chhāñv meñ sustā rahā huuñ

ye kaisā safar hai ye kaisī haiñ rāheñ

jahāñ se chalā thā vahīñ aa gayā huuñ

vahīñ aa.ī hai mujh ko lene ko manzil

jahāñ thak ke maiñ raah meñ gir paḌā huuñ

ufuq se pare duur hadd-e-nazar tak

na ho ḳhatm jo maiñ vahī rāstā huuñ

zamān-o-makāñ kī hadoñ se guzar kar

ḳhudā jaane aa kar kahāñ maiñ rukā huuñ

kahin fard se anjuman ban gaya hun

kahin anjuman mein akela mila hun

ujalon ka andaz pahchanta hun

andheron mein pal kar nikhar sa gaya hun

zamane se kah do idhar se na guzre

main zulfon ki chhanw mein susta raha hun

ye kaisa safar hai ye kaisi hain rahen

jahan se chala tha wahin aa gaya hun

wahin aai hai mujh ko lene ko manzil

jahan thak ke main rah mein gir paDa hun

ufuq se pare dur hadd-e-nazar tak

na ho KHatm jo main wahi rasta hun

zaman-o-makan ki hadon se guzar kar

KHuda jaane aa kar kahan main ruka hun