کہیں کہیں تو یہ منظر بدل گیا ہوگا

کہیں کہیں تو یہ منظر بدل گیا ہوگا

پہاڑ کٹ کے سمندر سے جا ملا ہوگا

کسی کی پلکوں پہ جب بھی دیا جلا ہوگا

تمام شہر اجالوں سے بھر گیا ہوگا

سلگتی یادو کریدو نہ میرے ماضی کو

جراحتوں کا کوئی وہ بھی سلسلہ ہوگا

وہ اپنے خواب کے ہیبت‌ زدہ اندھیرے میں

خود اپنی چیخ پہ یک لخت ڈر گیا ہوگا

تمام راستے ویران ہو چکے ہوں گے

اب ان کا شہر بھی صحرا سے جا ملا ہوگا

جدھر کا عزم سفر کر رہے ہو تم پرویزؔ

ادھر تو اور بھی تاریک راستہ ہوگا