kahin mandiron mein diya nahin kahin masjidon mein dua nahin

kahīñ mandiroñ meñ diyā nahīñ kahīñ masjidoñ meñ du'ā nahīñ

mire shahr meñ haiñ ḳhudā bahut magar aadmī kā patā nahīñ

yahāñ ghaav hai yahāñ vaar hai ye siyāsatoñ kā dayār hai

yahāñ koī terā janā nahīñ yahāñ koī merā sagā nahīñ

ye jo dil meñ dard kā raag hai ye dabī huī koī aag hai

maiñ vo zaḳhm huuñ jo bharā nahīñ maiñ vo daaġh huuñ jo miTā nahīñ

kahīñ yuuñ na ho tire haath meñ maiñ havā se mil ke bhaḌak uThūñ

abhī khel mat mirī raakh se maiñ sulag rahā huuñ bujhā nahīñ

mirī tāzgī se Dare hue haiñ ka.ī purāne gulāb bhī

mire haq meñ logo du'ā karo abhī Thiik se maiñ khilā nahīñ

na maiñ bhiiḌ huuñ na maiñ shor huuñ maiñ isī liye koī aur huuñ

ka.ī rang aa.e ga.e magar koī rang mujh pe chaḌhā nahīñ

vo jo haal chaḌh ke utar gayā jo ḳhayāl tham ke guzar gayā

kabhī tū ne mujh se sunā nahīñ kabhī maiñ ne tujh se kahā nahīñ

na to merā koī raqīb thā na to merā koī habīb thā

tujhe khonā merā nasīb thā mujhe tujh se koī gila nahīñ

mujhe she'r kahnā thā kah diyā mujhe she'r paḌhnā thā paḌh diyā

mujhe tāliyoñ kī havas nahīñ mujhe shohratoñ kā nasha nahīñ

ye jo botaloñ meñ sharāb hai ye ḳharāb thī ye ḳharāb hai

ise chhoḌ de ise toḌ de ye kisī maraz kī davā nahīñ

kahin mandiron mein diya nahin kahin masjidon mein du'a nahin

mere shahr mein hain KHuda bahut magar aadmi ka pata nahin

yahan ghaw hai yahan war hai ye siyasaton ka dayar hai

yahan koi tera jana nahin yahan koi mera saga nahin

ye jo dil mein dard ka rag hai ye dabi hui koi aag hai

main wo zaKHm hun jo bhara nahin main wo dagh hun jo miTa nahin

kahin yun na ho tere hath mein main hawa se mil ke bhaDak uThun

abhi khel mat meri rakh se main sulag raha hun bujha nahin

meri tazgi se Dare hue hain kai purane gulab bhi

mere haq mein logo du'a karo abhi Thik se main khila nahin

na main bhiD hun na main shor hun main isi liye koi aur hun

kai rang aae gae magar koi rang mujh pe chaDha nahin

wo jo haal chaDh ke utar gaya jo KHayal tham ke guzar gaya

kabhi tu ne mujh se suna nahin kabhi main ne tujh se kaha nahin

na to mera koi raqib tha na to mera koi habib tha

tujhe khona mera nasib tha mujhe tujh se koi gila nahin

mujhe she'r kahna tha kah diya mujhe she'r paDhna tha paDh diya

mujhe taliyon ki hawas nahin mujhe shohraton ka nasha nahin

ye jo botalon mein sharab hai ye KHarab thi ye KHarab hai

ise chhoD de ise toD de ye kisi maraz ki dawa nahin