kahin nahin hain aahaTen na tera intizar hai

kahīñ nahīñ haiñ āhaTeñ na terā intizār hai

magar vahīñ hai ik ḳhalish jo dil meñ barqarār hai

na tohmateñ na buġhz hai na hī gila bhī hai koī

magar savāl laakh haiñ bahut hī intishār hai

na mil sake qarīb se na hī judā hue kabhī

har ek chiiz nā-tamām ġham hai yā ḳhumār hai

duā nahīñ qubūl kī to rahmateñ navāzisheñ

abhī purānī ne.amatoñ se qalb taar taar hai

milā bhī aur milā nahīñ tū ek ḳhvāb sā milā

na chhū sakī na kah sakī jo haal āshkār hai

nasha nahīñ junūñ nahīñ na hī koī futūr hai

magar maiñ is ko kyā kahūñ ki sar pe jo savār hai

hai shaam kā vahī pahar vahī jagah vahī Dagar

baġhair ek shaḳhs ke koī alag dayār hai

kahin nahin hain aahaTen na tera intizar hai

magar wahin hai ek KHalish jo dil mein barqarar hai

na tohmaten na bughz hai na hi gila bhi hai koi

magar sawal lakh hain bahut hi intishaar hai

na mil sake qarib se na hi juda hue kabhi

har ek chiz na-tamam gham hai ya KHumar hai

dua nahin qubul ki to rahmaten nawazishen

abhi purani neamaton se qalb tar tar hai

mila bhi aur mila nahin tu ek KHwab sa mila

na chhu saki na kah saki jo haal aashkar hai

nasha nahin junun nahin na hi koi futur hai

magar main is ko kya kahun ki sar pe jo sawar hai

hai sham ka wahi pahar wahi jagah wahi Dagar

baghair ek shaKHs ke koi alag dayar hai