کہیں پہ رزق کہیں پر ہے گھر پرندوں کا

کہیں پہ رزق کہیں پر ہے گھر پرندوں کا

ہزاروں میل ہے لمبا سفر پرندوں کا

کہیں چٹانوں پہ ڈالی پہ اور چھتوں میں بھی

کہاں کہاں نہیں رہتا ہے گھر پرندوں کا

سہانی صبح نہ ہوتی نہ ہوتی شام حسیں

وجود دنیا میں ہوتا نہ گر پرندوں کا

یہ جوڑ لیتے ہیں تنکوں سے کس طرح تنکے

سمجھ سکا نہ کوئی بھی ہنر پرندوں کا

لکھا ہے جتنا مقدر میں رزق کھاتے ہیں

نہ جانے کیوں ہے کسانوں کو ڈر پرندوں کا

شکاری تاک میں بیٹھے ہیں جال پھیلائے

ادھر خدا نہ کرے ہو گزر پرندوں کا

سکون و امن ہو قائم جہاں میں پھر ساحلؔ

اے کاش لے لے اب انساں اثر پرندوں کا